Skiweekend im März 2024 idä Flumsi

Au das Jahr sind Bergföhnler und Nichtmitglieder id Flumsi go skiinä, e grossi Truppe simmer gsi und bereits am Fritig Morge miteme Bus ufegfahre.

Nacheme Apéro und Zimmerbezug häts am Abig es feins Chäsfondue gä. Dänn chli Spieli, es Schnüpfli… und natürli en Schlumi.

Am Samstig isches traumhafts Wätter gsi, d’Ski- und Snöberfahrer sind ab uf Pischte und Fuessgänger händ sich uf dä Fuessmarsch gmacht.

Zum z’Mittag hämmer eus idä Prodalp troffe, womer nachem Ässe nomal uf Piste oder go laufe sind. Nachem feine Nachtässe idä Pizzeria simmer id Slalomar go Party mache, tanze, singe und fäschte.

Am Sunntig isches dänn nöme ganz so schön gsi, drum simmer nachem ufruume und em Apéro id Sännestubä go z’Mittag ässe und händ eus dänn uf dä Heiwäg gmacht.

Es isch es wundervolls, unbeschwerts Wucheänd gsi, mit villnä luschtige Momänt und mir händs gnosse. Danke und bis nächst Jahr.