Neui Bergfasnacht 2015
Eusi Bergfasnacht ghört au scho wieder dä Vergangeheit a. Es isch än super tolle Alass mit vielne fantastische Darbütige gsi, u.a. vom Fräulein Klara äm Herr Bünzli und vom Harry Huggetobler, wo mit ihrem Klatsch und Tratsch über Gott und d'Wält charmant dur dä Abig gfürt händ. Traditionell isch dä Abig vo dä Bergtrychler i gschället worde. Dä Fleischvögel, d'Guggerächroser, d'Häxeschränzer, d'Mülitobelchroser und d'Tamboure und d'Froschfänger händ gschränzt was s'Züg haltet und s'Publikum so vo Bänk und Stühl grisse. Wo d'Tamboure ihres Repertoire zum Beschte gäh händ, isch d'Faszination vo dä Gäscht so gross gsi, dass am einte oder andere vor luter Stune dä Kiefer abe gheit isch. Die Schnelligkeit, Koordination, eifach dä Hammer!
D'Wüelmüüs und dä Bergföhn händ mit ihrne humorvollne sälber dichtete Schnitzelbankvers d'Lüt zum Lache bracht. Nach äm offizielle Programm isch bis i die frühne Morgestunde wieter gfästet worde.
