Skiweekend in Arosa 2020

Skiweekend in Arosa März 2020

Trotz em nöd so schöne Wätter händ sich die Erste bereits am Namitag mitem Palitabus auf dä Wäg nach Arosa gmacht. Nachere chlinere Schiibewüscherpanne und ere schliefrige Ufefahrt simmer dank super Chaffeur René sicher idä Mountain Lodge acho. Als ersts hämmer Zimmer bezoge und eus uf dä Wäg zum Apéro gmacht, mit dä Ziit sind die restliche Mit- und Nichtmitglieder itrudlet bis all 17 gmüetlich am Tisch ghöcklet sind. Nachem z’Nacht simmer tatsächli nöme in Usgang und händ dä Abig gmüetli bime Bierli und Wyli gnosse, töggelet und Dart gspielt.

 Am Samstig isch s’Wätter nöd würkli zum Schiifahre lässig gsi, drum sind die Einte go schlittle und apéröle und die andere wo sind go schiine händ Action gha. Eusers Mitglied dä Hans hät zeiget, das au mir Mänsche chönd flüge….. und dä Chrigi häts grad zudä Schii usgrüert.

Mir händ eus dänn idä Hörnlihütte zume gmüetliche und luschtige Mittagässe troffe. Nacher isches mit Schii und Schlitte wietergange, jedoch isches zum teil so steil gsi, dasmer dä Schlitte s’Tobel ab zoge händ vor luuter schiss 😊

Am Abig nachem z’Nacht isches dänn doch nu in Usgang is Dorf gange, aber mer sind dänn doch beziite is Bett will am Sunntig traumhafts Schiiwätter gsi isch. Diejenige wo nöd sind go schiine sind go schlittle und ufe romantischi Kutschefahrt gange. Es tolls Erläbnis!

Es isch wieder mal es richtig tolls Schiiweekend gsi und mir freuet eus jetzt scho, nächst Jahr wieder id Flumsi chöne z’gah.

Text und Bilder
Jeannine Honegger